Brekkegarden
NaKuHel Sunnmøre held til i Brekkegarden i Gjerdsvika i ei kulturminnelista sunnmørsstove frå 1893. Denne staden ligg der som eit minne frå ei anna tid, ei tid då vi kanskje var meir medvitne om samanhengane i naturen, og mennesket si djupe avhengigheit av, og tilhøyrsle til denne naturen. Trua på brubygging og heilskaplege forståingsmodellar ligg i botnen. Garden er møtestad for kunst og akademia, for naturfag og humaniora, for teori og praksis - men fyrst og fremst møtestad for menneske.
NaKuHel Sunnmøre skal:
Etablere aktivitetstilbod som femner om heile befolkninga
Vere synlege i lokalt folkehelsearbeid og i frivillig aktivitet
Styrke banda mellom praksisfeltet og akademia
Bygge lokale prosjekt i natur og helse-feltet
Hender, hovud og hjarte - i alt
ORGANISASJONEN
NaKuHel starta på Røst i 1987. På den tida var Gunnar Tellnes vikarlege der. Alle hans pasientar fekk det same spørsmålet: Kva skal til for at DU skal ha det bra, og trivast, akkurat her? Svara deira vart utgangspunkt for
ei satsing på trivselstiltak knytt til gode møte, natur- og kulturopplevingar. Slik vart organisasjonen som seinare vaks til eit landsfemnande nettverk av NaKuHel-verksemder skapt.
Alt arbeidet i NaKuHel er forankra i den salutogene helsemodellen. Salutogenese tyder helsa sitt opphav, og handlar dermed om å identifisere dei faktorane som fremjar god helse. Målet for verksemdene er å skape Helse, Miljø og Livskvalitet - for alle.
Å bli medviten om eigne talent og dugleiker er sentralt. Likeeins å auke fokuset på kva det er som må til for at vi skal kunne leve så fullverdige liv som mogleg. Det salutogene handlar fyrst og fremst om det å kjenne at ting heng saman - at det vi opplever gjennom livet er forståeleg, handterbart, og at det gir meining. Oppleving av samanheng er målet - medan opplevingar og aktivitetar i natur og kultur viser veg.